'Bahiketa': ibilitakoen bila

Autorea, bere obra eta Abya Yala

Lehen geldialdia

Buenos Airesko kale, usain eta paisaietatik garamatza Bahiketa eleberriak: abizen italiarrak eta pizza, mozzarella eta ferneta nonahi; Plaza de Mayo, Triunvirato etorbidea eta asadoak kale bazterrean; gurdidun kartoi-biltzailea, futbolaren erlijioa eta psikoanalisiaren habia. Baina baita Paris, Donostia eta Montevideo ere; baita ustezko lehen mundua, ezkerraren ajeak eta higaduraz urratutako harremanak ere. Sekulan Argentina zapaldu gabea izanik ere, irakurlea lur ezagunean ibiliko da, orain leun orain malkartsu, idazle gidari trebeak lagunduta.

Bigarren geldialdia

Asel Luzarraga bitan izan da Buenos Airesen; lehenengo aldian, bikotekideak bultzatuta joan zen, fikzioan Eduk Matxin bultzatzen duen bezalaxe, nolabait. Bigarren aldian, ordea, hautuz egin zuen harako bidea, 2012an:

Hemen (nire inguruan) aurkitzen ez nituen indarrak, mugimenduak, aukerak eta taupadak sumatu nituen Hego Amerikan, militantziari eta harremanei lotutakoak batez ere. Oso hutsik sentitzen nintzen etxean, lehen mundu honetan. Baina azkenean hemen nago, bueltan, motxila bat esperientzia lepoan, etxean jokatzeko gogoz. Nobela honek, noski, azken esperientzia horrek oparitutako gauza askoren arrastoa dauka. Omenaldia ere bada, hein batean.

Hirugarren geldialdia

Motxila horrek baditu, ordea, autoreak askatu nahiko lituzkeen zamak ere. Iragan abenduan, Amerika arteko Giza Eskubideen Batzordeak (AGBE) onartu zuen Aselek Txileko estatuaren aurka jarritako demanda, idazlearen aurkako prozesuan giza eskubideak urratu zirela ikusita. Prozesu horren nondik norakoak kontatu zituen Gezurra odoletan liburuan, baita gaztelaniaz ere (beste itzulpenak bezala, Tren en Movimiento argitaletxean). Azken hilabeteotan, elkartasun kanpaina abiarazi dute Euskal Herrian; hamaika atxikimendu jaso ditu Aselek, eta prozesuaren kostuak arintzeko aukera ere badu laguntza ekonomikoa eman nahi duenak, www.asel.eus webgunean azaltzen denez. Elkartasuna adierazteko beste modu bat, noski, Aselen liburuak eskuratzea da, ongi jakina baita errealitatea ulertzeko tresna esanguratsua dela literatura, eta arma boteretsua, berriz, ezagutza.

Azken geldialdia

Edu eta Matxin, liburuko bi protagonistak. Buru barruko bidaia batean abiatzen da Edu. Hain zuzen, saiatzen da bidaia horretan ez galtzen, burua ez galtzen, Matxin aurkitu nahian bila hasten zaionetik. Zenbateraino dira bereizgarri, ordea, bilaketa eta galera?

Asel Luzarraga

(Bilbo, 1971). Enpresa ikasketetan diplomaduna eta Euskal Filologian lizentziaduna da. Hainbat urtez irakasle jardun ostean, egun itzultzaile dabil. 2003. urtean Hamaika ispilu ganbil argitaratzeak eta VI. Igartza beka eskuratu izanak idazketa serio hartzera bultzatu zuten. Geroztik, eleberri hauek argitaratu ditu: Karonte, Mozorroaren xarma, Abaraska, Utopiaren itzalak, Gezurra odoletan, Bioklik eta Inoren munduan. Musikan ere aritu da, Punkamine eta Trio Ternura punk taldeetan.