Danele Sarriugarte: "Emakumeen grebak dira liburuan aipatzen den feminismo-era berriaren abiapuntua"

Kalean da Feminismoa % 99ren alde. Manifestu bat. Zer du testu honek manifestutik?

Manifestu Komunista aipatzen dute egileek, eta, hura bezala, manifestua da hau ere, asmo zehatz bat baitu, eta modu argian adierazten baitu hori. Dei bat ere zabaltzen du, “munduko langileak batu gaitezen” berritu bat, lanari, langileari eta klaseari buruzko bestelako ikuspegi batekin betiere, eta historian langileen mugimenduan bazter samarrean egon diren mugimenduen kritikak barneratuz.

Badago beharrik eta balio al dute gaur egun manifestuek?

Halako informazio-jasan bizi garenez, testua irakurri eta eskertzekoa da zuzena eta zorrotza izatea. Oso interesgarria eta beharrezkoa iruditu zait, orobat, gaur egun nagusi diren korronte politikoak identifikatzen dituztela eta horri uko egin eta beste bide bat lantzeko proposatzen dutela.

Aurkezten dituen hamaika tesiek feminismoetan dauden gaurko debateei erantzun nahi diete; Euskal Herrian badira edo ekartzeko modukoak dira?

Bai, guztiz. Euskal Herriko jardunaldi feministak ate joka ditugu eta uste dut liburuan aipatzen diren gauzak kontuan hartzekoak direla; gainera, emakumeen grebak dira liburuan aipatzen den feminismo-era berriaren abiapuntua, eta martxoaren 8ko grebek sekulako astinaldia eragin diote Euskal Herriko mugimendu feministari. Horri buruz gogoetatu beharra dago.

Gizateria osoak % 99ren aldeko feminismorako bidea egitea proposatzen dute autoreek; bat egiten al duzu horrekin?

Bai, batez ere % 99ren aldeko feminismoa hartuz haiek planteatzen duten moduan; hau da, mugimendu oro-hartzaile bat, baina badakiena –aurrez izan diren borroka, iraultza eta mugimenduak aztertu baititu– jendearen arteko elkartasuna eta batasuna ez dela berez sortzen. Batasuna eta elkarrekin borrokatzea aldarrikatzen dute autoreek, baina ez dute batasunari buruzko ikuspegi xalorik.