Free Otegi | Free Them All |

"Free Otegi - Free Them All" kanpainak beste aurrerapausu bat eman nahi du eta askatasun eskari bat askatasun aldarri bihurtu. Horretarako, Euskal Herriko hainbat musikari, abeslari eta artista batu ditu nazioarteko kanpaina honek, guztien artean abesti bat grabatzeko eta mundu osoan zehar zabalduko den bideoklip bat egiteko. Hitzaren aldeko apustua egiteagatik preso dagoen ahots bat isildu nahi izan dutenei erantzun nahi zaie, hainbat ahotsen batasunarekin, hitzez eta kantuz.

Talde artistiko eta teknikoa batuta dago. Konpositore eta produkzio lanetan, Joserra Senperena arituko da. Letragile, Edorta Jimenez idazlea. Kantuan, Sorkun Rubio, Furia, Ines Osinaga (Gose), Maite Arroitajauregi (Mursego), Joseba Tapia, Francis Diez (Doctor Deseo), Niko Etxart, Unai Iturriaga, Aitor Gorosabel (Su Ta Gar), Asier Serrano, Jon Gurrutxaga, Uxue Alberdi, Petti, Oier Aranzabal (Lou Topet), Xabi Solano (Esne Beltza). Eta estudioko musikarien artean Rafa Rueda, Karlos Aranzegi, Migel Artieda eta Iñigo Egia.

Helburua, Euskal Herriko bazter guztietan entzungo den abesti bat osatzea eta komunikabide tradizionalen zein Sarekoen bidez mundu osoan ikusiko den bideoklip bat sortzea, euskaraz, gaztelaniaz, ingelesez eta frantsesez. "Free Otegi - Free Them All" kanpainaren manifestuak dioen moduan "Gizatasunagatik. Justiziagatik. Garaile eta garaiturik gabeko irtenbidean sinesten dugulako. Bakearen aldeko apustua egiten dugulako. Horregatik Arnaldo Otegiren askatzea eta presoen Euskal Herriratzea eskatzen dugu".

Eskaera hori kantuz ere egiteko Euskal Herriaren laguntza da orain eskatzen duguna.

ZURE EKARPENA HEMEN | HAZ TU APORTACIÓN