Zergatik ez eta nola apika

Inoiz ez gara krisi honetatik aterako. Ez, behintzat, indarrean jarri dugun eskema ekonomiko eta sozial honen barruan. Hori aspalditik jakina zen arren, ez dugu deus aldatu nahi izan, eta orain ezin da gehiago itxaron: gure ekintzen ondorioak bistan geratzen ari dira, eta hondamendiaren lehen zantzuak, petrolioaren eskasia esaterako, ageriko egiten ari zaizkigu. Hortik petrokalipsi hitza, eta abiapuntu beretik azterketa gordin eta argigarri hau, egungo sistema energetikoari alternatibak eskaini nahian. Energia-iturri berriztagarrien erabilera txalotzen duten albiste arranditsuen aldean, liburu honek argi eta zehatz azaltzen du zergatik ez duten balioko ustezko konponbide horiek, eta irtenbide errazik edo lasterbiderik ez duen auzi honen aurrean ditugun aukerak aurkezten ditu, premiazkoak bezain errotikakoak denak.

Egilea, Antonio Turiel ikertzailea, erreferente handienetako bat da Espainiako estatuan erregai fosilen eta desazkundearen arloan.

Liburu honek, era ulergarri eta argudiatuan, argi uzten du agertokirik okerrena saihesteko, hots, “petrokalipsia” saihesteko zer egin behar dugun: zer egoeratan gauden ulertu eta horren arabera jokatu.

Pil-pilean dagoen auzi bat jorratzen du, klima larrialdia, baliabideen agortzea eta energia berriztagarriak xeheki uztartuz. 

Egilea

Antonio Turiel (1970, Leon, Espainiako Estatua). Fisika eta Matematikako lizentziaduna eta Fisika Teorikoko doktorea da. Gaur egun, CSICeko ikertzaile zientifikoa da Bartzelonako itsas zientzien institutuan, eta dibulgazio-lana egiten du hitzaldi eta argitalpenen bitartez. Horietako asko The Oil Crash gaztelaniazko blogean jaso ditu; esate batera, erregai fosilen baliabide konbentzionalen agortzeari buruzko teorizazioak eta desazkundearen aldeko txostenak. Petrokalipsia krisi energetikoari buruzko dibulgaziozko saiakera da haren lanik ezagunena, eta Sin energía (2022).

Nik ez dut aurreikuspen katastrofikorik egiten, pertsona batzuek behin eta berriz hala badiote ere: nik erakutsi egiten ditut dauden arazoak eta proposatzen diren konponbideen hutsak, baina, aldi berean, erakusten dut arazoa ez dela hain larria ikuspegi egoki batetik begiratzen bazaio, eta gauza asko egiten ahal direla arazoa txikitzeko eta, are, gainditzeko.