Alimentación inteligente, cocina saludable

Beganoa izatea ez da barazki bidezko dieta bati jarraitzea soilik, gehiengoak hala uste badu ere, harago doa; %100 landare-jatorrizko jakien erabilera da ezaugarrietako bat. Horrek, hasiera batean mugatua irudi balezake ere, sukaldaritzan askotariko aukera sorta zabala eskaintzen du, hainbeste non lehenengoz mundu horretan barneratzen den orok ustekabe atsegina hartuko baitu. Izan ere, osagai, zapore eta teknika ezezagunak deskubritzeko grinak sari gozagarriak ditu.

Beganismoaren aurrerakadarekin, landareetatik eratorritako errezetak biltzen dituzten hamaika sukaldaritza liburu argitaratu dituzte, oro har gure kultur inguruko platerak eskaintzen dituztenak. Animaliekiko errespetutik, enpatiatik eta maitasunetik abiatuta eta ikerketa urte luzeen, sukalde ordu askoren eta hainbat bidaiaren ondorioz, lan honek munduko 120 errezeta baino gehiago biltzen ditu, gehienak beganoak jatorriz eta beste batzuk begano bihurtuak; horrela, munduko hainbat kulturatako tradiziotatik ibilbide gastronomiko txundigarri bat aurkituko dugu.