Argitaletxea ¡Caramba!

¡CARAMBA! fanzinea 2011n sortu zen, umoreari eta haren mekanismoei buruz hitz egiteko, istoriotxo eta umorezko testuen bidez. Hain arrakastatsua izan zen, ezen bultzatzaileek argitalpenaren izen berdinarekin bataiatu baitzuten urte bereko amaieran sortu zuten argitaletxea. Helburua bikoitza zen: komikiak eta umorezko liburuak saltzea, bata, eta internetek argitalpenak saldu, sustatu eta ezagutarazteko eskaintzen zituen aukerak aztertzea, bestea.

¡CARAMBA!-ren katalogoa interneten usu aritutako egileen lanek osatzen dute, hala nola Alberto González Vázquezen Humor cristiano, Carmen eta Laura Pachecoren Let's Pacheco! Una semana en familia eta Xabi Tolosaren Esto se ha hecho mil veces lanek, baita El Hematocríticoren liburuek ere.

Estatu mailako umore grafikoaren adierazgarri nagusietako batzuk ere aritu dira ¡Caramba!-n: Paco Alcázar (La industria de los sueños), Pedro Vera (Ranciofacts) eta Manel Fontdevila (Reunión), besteak beste, hainbat egileren estreinako lanak ahaztu gabe, Néstor F., Molg H. eta Clara Sorianorenak kasu.

2015ean, Manuel Bartualek eta Alba Diethelmek zuzendutako ASTIBERRI argitaletxean sartu zen ¡CARAMBA!.