Barbarotasuna hizpide

«Sumatzen dut hainbeste gauza ditudala esateko non hobe baita ez nadin oso ikasia izan. Barbarotasun gisako bat gorde behar dut, barbaro iraun behar dut». Kateb Yacine aljeriar idazlearen aipu hori formula magiko modura ulertzen du Louisa Yousfi kazetari eta aktibistak: aldi berean eslogan estetiko eta alegia politikotzat. Ikuspegi horrek aukera ematen dio manifestu politiko eta literario honetan Chester Himes eta Toni Morrison idazleak, Booba eta PNL rap musikariak eta inperioari aurre egin dioten beste norbanako basatu batzuk elkarrizketan jartzeko, domestikazio mendebaldar zibilizatzailearen aurka. Mugimendu kolektibo antirrazista eta dekolonialaren baitan kokatzen baita liburuxka hau; zehazki, autorearen hitzetan: «Politikaren bidez ulertu nuen ez gaudela kondenatuak gure leku txikia lotsaz negoziatzera beste barbaro batzuen bizkar, baizik eta gure esku dagoela arbasoek hasitako duintasunaren aldeko borrokari jarraipena nola eman pentsatzea».

Mugimendu kolektibo antirrazista eta dekolonialaren baitan oihartzun handia izan duen autorea eta liburua da.

Herri-kulturaren oihartzunak dakartza, eta horrek irakurketa arinagoa egiten du, betiere teoria politikoaren baitan.

La fabrique argitaletxeak kaleratu zuen iaz Frantziako Estatuan, eta katalan eta gaztelaniazko itzulpenak bidean dira; lehenik aterako da euskaraz.

Saiakera benetan interesgarria irakurri dut: Rester barbare, Louisa Yousfirena. XXI. mendeko Frantziako deskolonizazioaren ondoriozko komunitate beltz eta arabiarren pertzepzioaren irakurketa kritiko bat egiten du autoreak, hainbat adibide erabiliz. Barbarotasunaren alde egiten du.

Yasmine Khris, Naiz.eus

Egilea

Louisa Yousfi Frantziako Estatuan bizi den arabiarra da. Kazetaritza du ofizio, prentsa idatzian zein ikus-entzunezkoetan. Rester barbare (La fabrique, 2022) da bere lehen liburua, oihartzun handia izan duena Frantziako Estatuan. Bere burua nola definituko lukeen galdetuz gero, “barbaroa!” erantzuten du.