Yahya Hassan

Yahya Hassan-en estreinako lanak haren bizitzaren historia kontatzen du, poesia bihurtuta. Etorkin palestinar batzuen semea den gazte baten historia, gazte zapuztu eta haserretu batena, gurasoek abandonaturik sentitzen delako, eta inguruan duen munduan arrotz.

Hassanen poemak arbasoen kontrako akusazio bat dira, aitaren bortizkeriaren kontra doaz, bai eta etorkin-belaunaldi oso baten kontra ere: erlijio-zurikeria egozten die, gizarte-laguntzez aprobetxatzea, hartu zituen herrialdearen kulturan integratzeari uko egin izana, eta seme-alabak erabateko abandonuan hezi izana.

Baliatzen duen idazkera original eta probokatzaileak immigrazioaren inguruko eztabaida bizitu du, hala Danimarkan nola Europa osoan. Baina liburu hau ez da, soilik, balio handiko testigantza bat haren hausnarketa dela medio: literatur lan indartsua da aldi berean, haren egileari nazioarteko aintzatespena ekarri diona.