Afektuen angelu-itsuak

Zimendu anitz pitzaturik dituzte bilduma honetako pertsonaiek, edo pitzatzear dituzte, afektu-dardaraldi betean direla. Zimendu egonkortzat zituzten horiek zimendu hauskor eta urrakor bilakatu zaizkie, deserrotze-sentimendu kontraesankorrak zeharkatzeraino. Askotariko pitzaduretan arakatzen dute narrazioek: besteak beste, helduleku afektiboetan, senidetasun-harremanetan, bizi-lekuetan, babes-espazioetan, lan-jardunetan gertaturiko pitzadurak irudikatzen dira. Aldaketa biziko gizarte-testuinguru batean kokaturik daude narrazioak, eta halakoetan deserrotzeak eta pitzatzeak aurreikusgarri bezain aurreikusezinak dira. Hain zuzen ere, zimendu aldakorren tolesdura horietan zehar bidaiatzen dute pertsonaiek: behinolako errotzeek gorputzean utzitako arrastoez dihardute, eta aldi berean, errotze horien galerek edo urratzeek sorturiko ezinegonak zein arinduak dituzte kontagai. Heldulekuez beste egitearen sentsazioetan arakatzen duen inarrosaldi literarioa.

Lurraz beste Garazi Arrula tafallarren bigarren narrazio-bilduma da, non beste behin erakutsi baitu nortasun kontraesankorren zirrikituetan arakatzeko trebetasuna, baita zauri zein zartatze afektiboak deskribatzeko gaitasuna ere.

Liburuko zortzi kontakizunek badute hari bat: behinolako errotzeek gorputzean utzitako arrastoez dihardute, eta aldi berean, errotze horien galerek edo urratzeek sorturiko ezinegonak zein arinduak dituzte kontagai.

Iratxe Retolaza literatur kritikari eta aditua ibili da editore lanetan, lehenago ere aztertua baitzuen autorearen obra literarioa.

Egilea

Garazi Arrula Ruiz. 1987, Tafalla (Nafarroa). Itzulpengintza eta interpretazioa lizentzia ikasi, eta doktoretza tesia aurkeztu zuen autoitzulpenaren arloan. Hainbat kultur egitasmotan eta komunikabidetan parte hartu du, esate batera, Hala Bedin, Berrian, Ahotsenean eta Laban. Haurrentzako eta helduentzako hamarnaka literatura lan ekarri du euskarara; besteak beste, Idea Vilariño, Anaïs Nin, Beatrice Alemagna eta Amélie Nothomben obra bana. Azkena, Sylvia Plathen Beirazko kanpaia eleberria. Sormen-lana itzulpenaz harago garatu du, eta Gu orduko hauek helduentzako ipuin liburua eta Bidean haurrentzako albuma idatzi ditu. Gaur egun editorea ere bada.