Has gaitezen irudikatzen

Hamar urte dira Sakau herrialdea desagertu eta Askayala sortu zela, herri askeen federazioa. Tentsioa, ordea, ez da aienatu, bizibizi baitago nazioarteko aliantza baten inbasioaren mehatxua. Ohi denez, balizko gerraren lehen frontea informazioa da, eta asko dago jokoan. Egoera horretan, Lorek eta Fabik euren egunerokotasun berriari aurre egin behar diote, kontraesanen, gaizki esanen eta erdi esanen artean. Bitartean, Costa Alegre auzoko herrialdean, batzuentzat itxaropen dena mehatxu da beste batzuentzat; Jacok eta Jacintok badakite hainbeste. Horiek dira lau pertsonaia nagusiak, eta bosgarrena, berriz, gizartea bera, bere egitura, eredu eta arkitektura berrituekin.

Esan gabe doa Simun Palsu fikziozko idazlearen trilogiako pieza bat da, gure eskuetara iristen den lehenengoa. Utopia bat, esan beharko. Bizigarria eta bidezkoa izan daitekeen zentzu komun baterako gonbita, Latinoamerikako tradizioak hain berezkoa duen errealismo magikoak zipriztinduta.

Unibertso utopiko oso bat eraiki du egileak, eta trilogia batean kontatzera dator; hauxe da lehen alea.

Gizakien arteko eta naturarekiko harremanak eta gizartea bera ulertzeko zentzu komun berriak proposatzen ditu.

Etorkizun hurbil desiragarria, non hain ezagun ditugun gatazkak, erronkak eta kontraesanak ez diren falta.

Egilea

Asel Luzarraga Zarrabeitia (1971, Bilbo). Enpresa ikasketetan diplomaduna eta Euskal Filologian lizentziaduna da. Hainbat urtez irakasle lanetan ibili ostean, egun itzultzailea da. 2003. urtean Hamaika ispilu ganbil (Labayru) argitaratzeak eta VI. Igartza beka eskuratu izanak idazketa serio hartzera bultzatu zuten. Geroztik, liburu hauek argitaratu ditu: Karonte, Eleberria lantzeko gida (Antton Irustarekin batera), Mozorroaren xarma, Abaraska, Utopiaren itzalak, Gezurra odoletan, Inoren munduan, Bioklik, Bahiketa, Uzta garaia, Malthusen ezinegona eta Denboran zatika.