Gaueko lanak, sistemaren kontra

Alexandre Jacobek ezohiko bizitza izan zuen. Bere lagun taldearekin, kazetariek “Gaueko langileak” izendatu zutena, hankaz gora jarri zuen Frantzia, hamaika desjabetze eginda. Ohar umoretsuak uzten zizkieten aberatsei, eta argi utzi ez zela beren poltsikoak betetzeko, gizarte ustela eraitsi eta beharra zutenen artean banatzeko baizik.

Artean mutikoa zela, mundua korritu zuen ontzi-mutil eta marinel lanetan. Ikasbide izan zuen ikusitakoa, eta sinesmen anarkistak sortu zitzaizkion. Injustizia eta hipokrisia jasangaitzak bihurtu zitzaizkion, eta horiei aurre egiteak kartzelara eta ezin lan egitera eraman zuten. Orduan ekin zien desjabetze antolatuei. Epaiketa entzutetsu baten ondotik, non bai epaileaz eta bai epaimahaikideez trufatu baitzen, uharte bakartu batean bortxazko lanetara kondenatu zuten bizitza osorako. Haren ibilbidea ezagututa, ordea, nekez pentsatuko dugu hola bukatuko zituela bere egunak; urte eta bizimodu gogorren ondoren, itzultzeko modua ere aurkitu zuen.

Zintzoa eta zuzena, argia eta eskuzabala, sutsua eta sentibera, Alexandre Jacobek lilura sortu izan du, lehen bezala orain, ustez Arsène Lupin pertsonaia inspiratzeraino. Gizon kementsu baten historia epikoa da hau, munduan oihartzun egiten jarraitzen duena.

Orain badakizue nor naizen: matxino bat, lapurreten mozkinetatik bizi den matxinoa. Gizarteak hiru bizibide baino ez dit eskaini: lan egitea, eskean jardutea edo lapurtzea Lana ez dut gorroto, are gehiago, gustukoa dut. Gizakiak ezin du lanik egin gabe egon. Gorroto dudana da gorriak ikusi beharra soldata baten limosnaren truke. Eskean aritzea duintasun oro zikintzea da, ukatzea. Denok dugu bizitzaren oturuntza gozatzeko eskubidea.

Egileak

Matz. Normandian jaioa da, 1967an, nahiz eta Martinikan hazia den. Txiki-txikitatik izan du komikia zaletasun, eta Zuzenbidea ikasi arren, idazketara aldatu zen ikasketak amaitu eta berehala. Literaturaren eta musikaren erreferentziak eta iturriak darabiltza, bideo-jokoetarako gidoiak sortzen ditu eta hogei liburutik gora idatzi ditu, gehienak, komikiak.

Léonard Chemineau. Ilustratzaile frantsesa da, 1982an jaioa. Ingeniaria da ikasketez, garapen jasangarrian eta ingurumenean aditua, nahiz eta komikigintza duen gaur egun ofizio. Angulemako jaialdian nabarmendu zen lehenengoz, talentu gazteen lehiaketan, 2009an. Ordutik, bost komiki argitaratu ditu.