Euskal hezkuntzagintzaren erronka zahar eta berriak, aztergai

Bidasoaren bi aldeetara, hezkuntza, gurea, egundaino ez zaigu emana etorri. Bi estaturen interesen zerbitzura eraikitako sistemen gainetik, herri honen behar eta nahiei erantzunez egin dugun eta egiten gabiltzan prozesua da euskal hezkuntza. Hori dela eta, euskal hezkuntzagintzaz hitz egiten da liburu honetan; bizirauteko behar gorrian sortu, bulkada komunitarioan hazi eta gaur egunean mehatxu eta erronka berriei aurrez aurre begiratu beharko diena. Euskal hezkuntza sistema publiko-komunitario euskaldun, feminista, demokratiko eta aske baten korapiloa dekolonitateetan askatzea dagokigu, kanpo, barne zein gure baitakoetan. Askatzea diogu... edo moztea!

Euskal herritarroi hezkuntza formala ez zaigu egundaino eman; kontrara, egin egin behar izan dugu, egiten gabiltza oraindik ere. Zentzu horretan, euskal hezkuntzagintza bati buruz solas egitea dagokigu, non gaurko oinarrietatik bultzatuko den –bultzatzen ari garen– hezkuntza euskaldun, publiko, burujabe eta feminista bateranzko prozesua. Hezkuntza-sistema publiko burujabea behar dugu herri burujabe batean eta, aldi berean, herri burujabe hori helburu, hezkuntza norabide horretan tinko bulkatzen behar dugu. Guri dagokigu, gu kolektibo zein indibidualoi, euskal hezkuntzagintza hurrengo geltokira eramaten indarrak jartzea.

Nora Salbotx Alegria

Egilea

Nora Salbotx Alegria (1973 Iruñea). Haur Hezkuntzan eta Psikopedagogian graduatua da, Landa Eremuko Hezkuntzan aditua eta Hezkuntza eta Komunikazioan masterra egina du. Mondragon Unibertsitatean eta Nafarroako Unibertsitate Publikoan irakasle aritutakoa, gaur egun Amaiurko eskolako zuzendaritzan eta Baztango Herrietako Eskoletako koordinazioan dabil. Hik Hasiko, Herri Hezitzaileen sareko, Eusko Ikaskuntzaren hezkuntza lantaldeko eta Plaza Hutsako kide. Bertze hainbat elkarte eta eragilerekin kolaboratzen du hezkuntza aferetan. Irakasleen formakuntzan aritzen da hizkuntza idatziaren didaktika eta landa eremuko hezkuntzaren ildoak jorratuz.